Блякла-сіняе неба і чырвань галін.
Уздыхае ветрык. Спадае ліст.
Асьцярожнае сонца з голых асін
Выпаўзае на ціхі сінічы сьвіст.
Ледзь хістаюцца ў небе галіны бяроз.
Лёг спакой на іржышчы. Гумённы дым.
Ярам рушыць павольна з дрывамі воз,
І сарока няспынна стракоча над ім.
У разьведку за возам ляціць яна,
Трэба край адшукаць, дзе пякуць бліны,
Дзе кайстра, дзе ў ёўні жыве цеплыня,
Дзе заснула сытасьць да новай вясны.
1964–1968
|
|
